الخميس، 26 مارس 2009

ياخي وينك ... ووين حروفك
كم زمن ما جيت جوارنا
لانا قادرين نعرف خبورك
لاهو طيفك جانا زارنا

وللخيال أشرعنا خيلنا

جينا قاصدنك زيارة
لا المراسي لينا لاحت ...
لانا شفناها الفنارة

كيفك إنت ...
وكيف حروفك

لسة تريانة وندية !!!
وهل حنينك ياهو زاتو
بيمسح الهم والأسية!!!

لسة طاريها الزيارة ...

ولا المشاغل ليك بتمنع؟؟؟
وهل بيعبر في خواطرك
إنو شوقنا ليك بيوجع؟؟؟

غرقنا في الدمعات ...
وبرضك
ما بنزعل أو نعاتب
في قلوبنا عميق بتسكن
وليكا نحن كمان حبايب

نحن ما بنرضاهو زعلك ...
لا لا ما بنحمل بعادك
أبقى طيب وديما طيب
ربي احقق كل مرادك

ليست هناك تعليقات:

إرسال تعليق