الثلاثاء، 21 أبريل، 2009

شبابيك الحنين

أفتح شبابيك الحنين
وادخل عليك زي الشعاع

شايلاها أشواق السنين
رامياها صفحات الضياع


ألقاك عشم مالي الدروب

أرجاك نغم حاني وطروب

ممدودة كفك بالأمان

الكان زمان قايلاهو ضاع


أدسّ فيك...

أسكن عيونك والعصب

أنسى التعب

القاهو قلبك لي وطن

حضن وملاذ

سكة سعادة كاسيها الفرح

في دروبا شاع


أمشيها خطواتي القبيل

وقفت كتير

في سكة الضنى والعذاب

توصل معاك

تعبر بحور الريدة والفرح التساب

كفيك على المجداف تحن

وايدي معاك ماسكة الشراع

ويــنِــك؟؟!!

غايبة لكن روحي حاضرة
داخرة أشواقي المسافرة
لي عيون بالريد بتنطق

جاني صوتك كالنسايم
شايلة أشواقو الحمايم
بي جناحاتا بتصفق

جاي يسأل عن غيابي
عن معاناتي وعذابي
عن هموم قلبي البتحرق

جاي يسأل عن شجوني
عن جراحاتي وأنيني
عن شموسي المابية تشرق

إلا صوتك لما جاني
بالفرح والريد كساني
كفكف الدمع المدفق

جاني بالآمال يغني
وبالحنان يملاهو دني
نرشف الحب المعتق

نزرع الريد في دروبنا
نمسح الهم من قلوبنا
تصفى دنيانا وتروِّق

الاثنين، 13 أبريل، 2009

حـــصـــار

وتركتني...


يا أُنسَ الزمان


بلا غطاءٍ أو دثار


وأحاطني بؤسٌ


كبَّل ساعدي


قلبي... وكلَّ جوانحي


ورماني في لجّةِ الأحزان


ترميني موجةٌ...


أخرى تهدهدني...


أقاومُ التيار


فأفلت من حصار الموجِ...


أجد الموج أفلته الحصار


الأربعاء، 8 أبريل، 2009

حـــالـــة حــــــــب

فصل الجفاف فاتنا ورحل


إخضرّ وادينا الوريف


فاحت زهور الروض عبير


أشجارو زادت في الحفيف


أطيارو بالنشوة امتلت


غنت تنادي على الوليف


وأنا بيكَ أكواني إزدهت


وفؤادي زايد في الوجيف


دنيايَ صبحت دنيا غير


مزدانة بالحب العفيف


يا أغلى من روحي ودماي


ليك القلب قصراً منيف

السبت، 4 أبريل، 2009

أنا بشبهك!!!!

أنا بشبهك...

ما إنت...

أنا

بيكَ حياتي مدوزنة

بنزل حنينك زي مطر..

راجياهو كمينك سنة

عطشانة ليك كل الجروف

محزونة قاعدة ممحنة

مشتهية نسماتك تمر

ريحة دعاشك تسكنا

كل الحروف يا قوس قزح

هيمانة بيك متلونة

شايلاها أوتار الحنين

وأنغام مشاعر ودندنة

غـــيـــم الشـــــوق

وانا في انتظارك ..
إرتكزت على القمر
دوبيت مواويل الوجع
واللهفة والشوق اللهب

تاكيت شبابيك الحنين
ناديت نجيمات الشجن
والآهة والشقا والتعب

حنت غيوم الشوق ...
مرقت ضفاير الليل
بتنادي هوي يا قمر

(يا قمرة ...
اقلبي السنسنة الحمرة ...
شوفي الحبيب ما جا)
او جانا منو خبر


جانا القمر حفيان
سايق مواجعو سهر


شايل مواعيدك
مهدود وحيلو فتر


ورجعت غيوم الشوق ..
مرقت ضفاير الليل
بتنادي هوي يا قمر

(يا قمرة ...
اقلبي السنسنة الحمرة ...
شوفي الحبيب ما جا)
أو جانا منو خبر