الخميس، 20 مايو، 2010

ياخطوة في السكة



ياخطوة في السكة

والسكة بيك تايهة

كترت محطاتك

والشوق يساسق بيك

شايلاهو زاد رحلة

والرحلة كم طالت

زادت معاناتك

كم دمعة في الخطوة

رجعت قبل توصل

مكتومة آهاتك

لي وين مداك يوصل

توصل معاهو الروح

والروح معاك بتروح

تشتاق مواساتك

ياخطوة في السكة

سككك بلا آخر

بعدت مَداراتك

وين ضلك المنهك

مجدوع ورامي بعيد

كايس مُداراتك

ياخطوة عز الليل

كيفن تعدلي الميل

تاهن دريباتك

والريح تقالع فيك

تكتح هموما عليك

قفلت مساماتك

ياخطوة شدي الحيل

أرمي التعب بي وراك

سوقيها خطواتك

ياخطوة في السكة

تشرق شموس فرحك

سككك تضويلك

تصدح غنيواتك