الثلاثاء، 15 نوفمبر، 2011

وَدَارْ

كل الحروف ضلت
دربك دخل في الجُب
والجُب قرارو بعيد
وإنت البعيد بالروح
غريب وسط أهلك
تايه .. خطاك ودرت
ضاعت مفاتيحك
إنسدّ باب نَفَسَك
غرّقت فيهو أساك
ياخطوي وين ماشي
وَحَلَك مغطيكَ
راجي المَحَل يغشاك
ولّا المطر يطراك؟
مشرورة أوهامك
منهوبة أحلامك
غيم الحزن يبراك
وجعك تشيلو براك
فك فك ضفيرة الهم
مشِّط شَعَر زهجك
قص قص شرايط الشوق
غيب في الحنين ما تفوق
والريد درب محظور
مافيهو مين يقراك




نون
الخرطوم
14/11/11







ليست هناك تعليقات:

إرسال تعليق