الثلاثاء، 21 أبريل، 2009

شبابيك الحنين

أفتح شبابيك الحنين
وادخل عليك زي الشعاع

شايلاها أشواق السنين
رامياها صفحات الضياع


ألقاك عشم مالي الدروب

أرجاك نغم حاني وطروب

ممدودة كفك بالأمان

الكان زمان قايلاهو ضاع


أدسّ فيك...

أسكن عيونك والعصب

أنسى التعب

القاهو قلبك لي وطن

حضن وملاذ

سكة سعادة كاسيها الفرح

في دروبا شاع


أمشيها خطواتي القبيل

وقفت كتير

في سكة الضنى والعذاب

توصل معاك

تعبر بحور الريدة والفرح التساب

كفيك على المجداف تحن

وايدي معاك ماسكة الشراع

هناك تعليقان (2):

  1. روعة .. يا نهلة (سمندل)

    ردحذف
  2. جايكي يا اخر المواني,,,,,
    افتح شريان الشارع استقبل نيلي الحنا,,,
    افتح شريان الشارع شان العصفور يتهنا,,
    افتح فتحتين ننضم ضمتين والنون سكون ,,,,
    وسكونوا نون
    المويا نيل والشوق تقيييييييييل.

    ردحذف